Alexi Nay e Marcus Hobi

Alexi Nay (cant, flauta, suna da bucca, ritmica) Marcus Hobi (cant, ghitara)

01. Il Toni da Strada Ils cuntschacazzettas ein oz arrivai
Cun corns, clarinettas e gegias armai
Vus giuvens, vus giuvnas, vegnî spèrt neutier
Il Toni de Strada ei cheu en quartier

La stiv’ei pinada, splanaus il plantschiu
Las brels fan parada en bargia cheu giu
Signur capitani fa oz igl ustier
Il Toni de Strada ei cheu en quartier

La matta festgina de bein sefittar
La mumma cuschina de dir e de rar
Il bab che sesprova de far il barbier
Il Toni de Strada ei cheu en quartier

En roschas arriva la pèra sil plaz
E prest uss en stiva entscheiv’iI sulaz
Cun polcas, mazurcas ed auter vitier
Il Toni de Strada ei cheu en quartier

Il Paul, la Madleina van tut a sparuns
Quel seglia, tschel geina culs mauns sils caluns
Ils mats che sedrovan, lain lartg il culier
Il Toni de Strada ei cheu en quartier

Ils purs cun las puras ein spir cumpliments
Signurs cun signuras che fan spergaments
Il farer emblida perfin siu brevier
Il Toni de Strada ei cheu en quartier

02. Surselva O Surselva, vallada grischuna
Tiara dil cant e dils poets
Tiara dils cuolms e dils maluns
Surselva, ti vegns savens idealisada

O Surselva, vallada alpina
Cuntrada dils runals e dils lags artificials
Cuntrada dils jasters che acceptan buca tei
Surselva, fa il svilup buca temer tei

O Surselva, vallada bandunada
Tiara surbaghegiada per vacanzas
Tiara che piardas la giuventetgna
Surselva, lais buca encrescher pils tes

O Surselva, vallada romontscha
Cuntrada dil grüezi e dils spaghettis
Cuntrada d’hotels e da bars
Surselva, ti eis vegnida moderna

O Surselva, vallada semidada
Tiara da nos siemis
Biala tiara carezada

03. Quei dat ei buc tier nus Pacifists ed anarhists
Communists ed ateists
Socialists e millionars
Faschists ed antimilitars
Caulds ni homosexuals
Pitaunas e bordels
Rumpalètgs e bueders
Valanuots ed auters feghers

Quei dat ei buc tier nus
Quei ei nunpusseivel
Quei dat ei mo els gronds marcaus
Zatgei aschi sgarscheivel
Tgi che vul buca crer
Duei leger la Romontscha
E lu sa’l constatar
Quei dat ei buc tier nus
Quei ei mo tschontschas
Quei fuss gie scandalus
Quei fuss gie turpegius
Na zatgei aschia dat ei buc tier nus

Augsegners che fan sbagls
Polizists ch’ein sezs canagls
Lètgs ch’ein decadentas
Scartiras maldischentas
Suicids e mazzaments
Politichers malprudents
Carplin’e violenza
Glieud senza existenza

Vegls scatschai e bandunai
Affons pigns schlagai
Giuvenils che prendan drogas
Femnas sut las rodas
Gronds che maglian en ils pigns
Cun daners ni cun rampins
Farisers e nuncartents
Scribents tractai sco delinquents

Ina cert’opposiziun
Caumas e demonstraziuns
Scolasts che vegnan buc damogn
E mettan certs scolars ord gl’ogn
Giuvens bess dad ina vart
Tractai senza risguard
Tals che van da rar a messa
Zensuras ella pressa

04. Ina canzun Tras la vallada va la canzun
Che tschaffa scadin cun siu schi bi tun
Ella raquenta ch’in signur blau
Tertgavi ch’el seigi dil pievel il tgau

EI hagi il pievel gl’emprem cussegliau
Pli tard lu schizun per quel patertgau
Gie el savevi perfin quintar
Tgei che mintgin possi magunar

Cu quei signur hagi schau il tschadun
Seigi la glieud stada senza tgamun
Carstgauns disai da buc patertgar
Hagien uss stuiu sesez segidar

Gl’emprem seigi quei iu empau vess
Mo mintga di vesev’ins progress
E finalmein seigi’l pievel sefatgs
Ed hagi anflau siu agen patratg

Mo descendents dil nausch rampun
Vivien aunc oz, resda la canzun
Gest perquei cantei savens la canzun
E mai emblidei siu mied’e siu tun

05. Il tarden Jeu sundel mo in toc tarden
E vegnel conservaus sc’in scazi
En stiva biala vid la preit
Sche quei ei buc fatg da tamazi
La puorla fan ei giu a mi
Schubregian mei pir ch’il tapun
Mo jeu sundel pauc cuntents
Sehonel da tut quei nuotzun

Schi bugen fuss giun nuegl
E manischass empau cun grascha
Udess ils tiers a remagliar
E schubergiass giud punt la buatscha
Bugen vegnessel e duvraus
Sco fuortga per cargar il fein
Ni per far ô munts da talpas
Tut quei fagess a mi schi bein

Il pur ch’ha mei duvrau onns ô
Ha mai cartiu ch’jeu vali bia
Mo cul parler ha dau tschun francs
Ha el vendiu mei, quei gnahà
Il parler er’in malign
Numnau ha’l mei antiquitad
Quei ha impressiunau fetg biars
Ed el ha vendiu mei per in tschuat

Quei signur ch’ha mei cumprau
Possedeva buc in lidimer
Ed el ha mess en stiva mei
Gest sisu iI canapè
Tgei cletg ch’jeu sun buc il sulet
Ch’ei trests en quella stiva
In pèr amitgs ein cheu cun mei
E partan tgeuamein l’umbriva

Il ruog da matgs ei in cuzer
La cazzol’er’ina roda
II bigniel ei tut sepiars
Sa sch’el ei cuntents sin quella moda
Sur mei penda in parlet
Dalla vart dretg’ei in curter
Il giuv ei gest visavi
La panagl’ei on zuler

Cheu sun jeu pia toc tarden
E vegnel conservaus sc’in scazi
En stiva biala sul canapè
Sche quei ei buc fatg da tamazi
La puorla fan ei giu a mi
Schubregian naven mintga tac
Mo jeu daventel mai cuntents
Sehonel da tut quei in cac

06. Al Rein Jeu scrivel oz a ti
Perquei che jeu hai fatg persenn
Che ti eis gia in temps
Trests e bandunaus
Schi leghers eras inaga

Jeu scrivel oz a ti
Per s’exculpar en num da tuts
Per las figuras
Fatgas enviers tei
Che piteschas tgeuamein

Jeu scrivel oz a ti
Perquei che biars ein
Buc pertscharts
Che las maltscheccadads
Commessas enviers tei
Fan fetg mal a ti

Jeu scrivel oz a ti
È en num da quels
Che vulan prender
Da tei tutta veta
En num da quels ch’han
Buc cunscienzia

Jeu scrivel oz a ti
Silmeins per far a ti speronza
Che ti possies surmontar
Temps pli grevs, jeu sai
È ti drovas bia sustegn

Jeu scrivel oz a ti
Per puspei far endamen
Che ti hagies aunc amitgs
Che tegnan ferm cun tei
Buc emblida quei

Jeu scrivel oz a ti
Per mo dir a ti
Che nus duvreien tei
Che nus saveien
Buca viver senza tei

07. Per anflar communitad Oz munglass’ins far baracca
Beiber vin, vinars ch’ei dracca
Per anflar communitad

Oz munglass’ins dar la bucca
Tochen ch’igl ei d’ir en cucca
Per anflar communitad

Oz munglass’ins far rueida
Far tunar dil ver muneida
Per anflar communitad

Oz munglass’ins far canera
Dir buschias far sco geva
Per anflar communitad

Paupra quel che ei solids
Ei ruasseivels e sincers
Quel segir segir che resca
Da restar in eremit

08. La veta sgola La veta sgola
E fa adia
Al carstgaun ch’ei alla riva
E spetga
La veta
Ch’ei vargada
E mai tuorna
Na mo sgol’
Ad in sgular

Perquei sgola cun la veta
Tras sulegl
E tras stempraus
Maina lai da sias alas
Vid ella
Ferm setegn
Ch’ella daventi ti’amitga
E che ti possies ell’enconuscher
Sin ch’il sgol ei lu a fin

09. Ti fiug Ditg has ti fiug teniu
E derasau calira
Mo ussa eis ti stezs
Il vent ha tei surpriu

Forsa fug’aunc la burnida
Sut tia tschendra grischa
Fors’il favugn da primavera
Cun sia forza tei envida
Forsa enzatgi che metta
Ella burnida in rom sec
Ni ch’in sufla aschi ditg
Toch’ins ves’ina flommetta

O ti fiug, silmeins in mument, mo in mument
Duesses arder sco antruras e dar cauld

Mo la burnida sesferdenta
E siu tgietschen vegn pli stgirs
II ner da cotgla dominescha
Mo ina sbrenzla tgeuamein semuenta

Sbrenzla, ti eis la restonza
Da flommas grondas, maiestusas
Ti tarlischas sc’ina steila
Ed eis il segn da speronza
Pertgei ina sbrenzletta sa
Esser I’entschatta d’in grond fiug
Daco duess buc quella sbrenzla
Flommas derasar

10. Il desideri Cul favugn ei ord cadeina
E tila tras nossa val
Lu tschaffa nus il desideri
Che fa stenscher tut il mal

Che fa nescher nova veta
E luenta sentiments
Gie cu l’aria ei schi tievia
Cresch’en nus igl ardiment

Quell’ardur che brischa
E garegia aunc dapli
Daco duessel ella sbetter
Ella ch’ei zatgei schi bi

Culla nav dil desideri
Laschel mei uss tschallatar
Senza mai vegnir a riva
Vi en perpeten navigar

11. El tren El tren, sco adina
Maletgs cumparan e vargan
Carstgauns che entran e sortan
El tren hai jeu viu ella

Ell’ei entrada, sesida visavi
Nossas egliadas han dau il maun
Lu vein mirau ô ella notg
E tiu maletg ei cumparius
Leuô el stgir e tras il veider
Ein nos egls lu s’entupai
Per in mument e ti has ris
Jeu è in téc da quei schenau

Jeu vess bugen tei dumandau
Co ti has num, nua ti vas
Mo quels pèr plaids ein stai fitgai
En il culiez ed il tren ei sefermaus
Ti eis s’alzada
Sortida tut bufatg
Ti has laschau a mi l’egliada
In surir e tiu maletg

El tren, sco adina
Maletgs cumparan e vargan
Carstgauns che entran e sortan
El tren hau jeu vi tei

12. Annatina Tes egls ners ein schi profunds
Che jeu negass bugen en lur intern
E lu lessel svanir en la profunditad
E mo semiar

Annatina
Tei vai sgarscheivel bugen
E tudi siemiel mo da tei

O ti biala
Tei vai sgarscheivel bugen
E schi profunds
Ein tes egls ners
Els giavinan mei
Jeu stoi uss sesurdar
Annatina

Tes egls ners ein schi profunds
Che jeu negass bugen en lur intern
E leu lessel restar
E tei mo carezar
Annatina
Jeu hai tei bugen

13. Jeu less tei Jeu hai il sentiment ch’jeu hai bugen tei
Mo tuttina, jeu sundel buc diltut segirs
Mes patratgs e sentiments ein trubistgai
E mintgaton hai jeu il sentiment
Ch’jeu hai bugen tei

Cu jeu sun persuls sche lu patratg’jeu
Vid tei, vid mei e vid noss’amur
E sun cuntents
Mo lu eis ti puspei lunsch naven da mei
Ti eis sco jastra
Ed jeu sun trests
Sai buc midar memez

Mo puspei hai il sentiment
Ch’jeu hai bugen tei
Jeu sentel, tut ei uss schi clar
Ti, jeu crei, ch’jeu sun diltuttafatg segirs
Jeu less tei
Jeu less mo tei ti cara

14. Canzun dils vagabunds Finalmein cun bia stentas
Essan en in vitg
Lein ir leu ell’ustria
Mirar sch’ei dat in sitg
Empau havein pitiu
Calira e tempiasta
Ed ussa lein guder
Beiber e far fiasta

Lu essan nus cuntents
Pli cuntents ch’il retg da Frontscha
Nuot sa nus stermentar
Sche nus mo savein cantar
Sunar e viagiar
Pigl entir mund entuorn
Saltar e far da stuorn
Engular enqual gaglina
Carsinar ’na matta fina
Lu essan nus cuntents

In dus dis stein nus aunc cheu
Per serinforzar
Nies viadi ei aunc liungs
E nus lein buc sesfar
Mobein far in téc legher
Beiber vin, magliar schambun
Lu essan nus en fuorma
Desiderein nuotzun
Sche nus mo savein cantar...

Mo ei va buc ditg
Che nus mein vinavon
Perquei che nus serebalzein
Dad esser en camon
Lu stuein naven tilar
Viers autras cuntradas
E leu en cumpignia
Adina far risadas
Lu essan nus cuntents...

15. Vagants inamurai Nus mein fetg lunsch entuorn
Vesin bia bialas mattas
E mintgaga danovamein
S’inamurein en novas fatschas
E nies cor vul sescarpar
Cu nus stuein naven tilar

Mo igl ei nossa sort
D’adina viagiar
Girar per tut la tiara
E biaras carezar
Sco quella ch’ha ier sera
A mi fatg biala tschera

Has viu ses cavels ners
Schi liungs e tarlischonts
Jeu vess aschi bugen
Strihau els cun mes mauns
Mirau ad ell’els egls
E detg tei hai bugen
Ell’era cun amitgas
Cantond, fagend risadas
Ha viult mo cuort il tgau
E dau spert in’egliada
Che ha miu cor tuccau
En mei l’amur svegliau

Jeu siemiel oz trasô
Da sia cavellera
Tgisa sch’jeu vesel ella
Aunc enzacu cursera
Lu fussel jeu da buna luna
Dess alla bial’ina buna

16. Stai bein in’autra ga Jeu less ch’il temps
Che ei stulius
Turnass aunc inaga
Gl’ei stau schi bi
Da star cun tei
Stai bein, in’autra ga

Nus vein cantau
Giu endamen
Risdau e buiu bien vin
E mintgaton
Vein emblidau
Che mintga sera va a fin

Mo mir’ei catscha
Gleiti dis
Nus stuein uss s’absentar
Gl’ei stau schi bi...

Il temps che ei
Vargaus schi spert
Lez tuorna mai mai pli
La regurdientscha
Sa denton
Negin prender a mi

Engraziel fetg
Per tut il bien
Nus stuein uss ir a ca
Gl’ei stau schi bi...