Alexi Nay (cant, clavazin) Marcus Hobi (cant, ghitara) Curdin Janett (bass, accordeon) Domenic Janett (clarinetta) Andriu Maissen (percussiun) Clau Maissen (saxofon) Eva Storz (cello)

01. Salischina Siado sil conn da Salischina
Vivev’in um cun ses dus fegls
Ils cuolms, ils tiers e las historias
Quei fuv’lur mund, artau dils vegls

Ord la miraglia dalla tegia
Gnev’ina siarp mintga damaun
Mav’a meisa culs dus buobs e
Bueva latg, magliava paun

Suenter solver termagliavan
La siarp e’ls buobs cun il sulegl
In di staup’il bab la ruosna
La tegia ei stgira sc’in nuegl

Ed ils buobs han schau encrescher
Han ni buiu pli ni magliau
Entoch’il bab ina tschavera
La siarp ha puspei liberau

Cunquei ch’els mavan mai a messa
Ei’l bab vegnius clamaus dil prer
El entr’en stiva digl augsegner
Cun capial’e caput ner

Ed el penda la capiala
Vid in radi dil sulegl
Che deva en da finiastra
Il prer ei plein smarvegl

Els sediscuoran in’uriala
Lu di il prer avon che ir
Ti mund ei leu, si Salischina
Stai bein bien um e va ensi

Ed el pren puspei sia capiala
Giud il radi dil sulegl
E va ensi viers Salischina
Si en siu mund, viers il sulegl

02. Amur la stad La stad ei cuorta leu els aults
Paucs dis ad onn fa’i in tec cauld
El mescal lom e plein d’odur
L’entira stad vein fatg l’amur

Nus essan sezugliai el vent
Vein schau purtar da quel naven
En mellis teigias da colur
En mellis neblas plein odur
L’entira stad l’amur

Stads pli tard leusi els aults
Hai tschercau ils dis pli caulds
L’odur dil mescal ha fatg endamen
Ch’jeu vevel tei schi bugen

Nus eran sezugliai el vent
E schau purtar da quel naven
En mellis teigias da colur
En mellis neblas plein odur
L’entira stad l’amur

03. Al Rein Jeu scrivel oz a ti
Perquei che jeu hai fatg persenn
Che ti eis gia in temps
Trests e bandunaus
Schi leghers eras inaga

Jeu scrivel oz a ti
Per s’exculpar en num da tuts
Per las figuras
Fatgas enviers tei
Che piteschas tgeuamein

Jeu scrivel oz a ti
Perquei che biars ein
Buc pertscharts
Che las maltscheccadads
Commessas enviers tei
Fan fetg mal a ti

Jeu scrivel oz a ti
È en num da quels
Che vulan prender
Da tei tutta veta
En num da quels ch’han
Buc cunscienzia

Jeu scrivel oz a ti
Silmeins per far a ti speronza
Che ti possies surmontar
Temps pli grevs, jeu sai
È ti drovas bia sustegn

Jeu scrivel oz a ti
Per puspei far endamen
Che ti hagies aunc amitgs
Che tegnan ferm cun tei
Buc emblida quei

Jeu scrivel oz a ti
Per mo dir a ti
Che nus duvreien tei
Che nus saveien
Buca viver senza tei

04. Bi da seveser Amitgs nus essan oz cheu ensemen
Gl’ei bi da seveser suenter liung temps
Cun nos desideris, cun nossas damondas
Sesentin buc persuls en quels muments

Giu en las vals da passadetgna
Leu sundel piars e bandunaus
Viado els vents aschi crudeivels
A frusta mon, tut isolaus

Amitgs nus essan oz cheu ensemen
Gl’ei bi da seveser puspei inaga
Cun nos panzieris, cun nossas temas
Sesentin buc persuls uss quella ga

Miu patertgar, mias ideas
Duein buc semover en rudi
Less empruar cun vus ensemen
Da veser clar igl avegnir

Amitgs nus essan oz cheu ensemen
Gl’ei bi da seveser e ver endamen
Cun nos misteris, cun nossas spronzas
Sesentin buc persuls en quels muments

Ed anfl’jeu buca pli la via
Atras las vals, encunt’ils vents
Lu sai jeu bein, amitgs vus essas cheu
E tut fa buc pli ton sterment

Amitgs nus essan oz cheu ensemen
Gl’ei bi da seveser suenter liung temps
Cun nos misteris, cun nossas damondas
Sesentin buc persuls en quels muments

Cu sevesin nus l’autra ga
Cun nos desideris, cun nossas spronzas
Lein nus beingleiti sentupar

05. En nos mauns Amitgas, amitgs, lein mirar anavos
E dar in’egliada viaden el vargau
Lein seser ensemen e schar repassar
Quels onns davos nus ch’ein per semper vargai
Zanua en nus, leu ein tut quels muments
Che nus essan vivi enten semper marschar
Senza paus e ruaus mo adin’anavon

Amitgas, amitgs, quels muments ch’ein naven
Sc’in vent vein sentiu els levet sin la pial
Lu auters puspei ein stai ferms, burasclus
Ed han leventau nus profund egl intern
Mo tuts ein en nus, ina part da nusezs
Certs tuornan traso puspei neunavon
Ed auters sesfundran el stgir dil vargau

Amitgas, amitgs, sentis uss il vent
Co’l carsin’ils cavels e streha la pial
Lein buc patertgar anavon anavos
Lein viver gest uss e guder quei mument
El tuorna mai pli, ei per semper naven
Svanescha zanua afuns enten nus
Sentis uss il vent silla pial, els cavels

Amitgas, amitgs, lein mirar anavon
Schar ir noss’egliada enviers il lontan
Ils onns davon nus che negin ha aunc viviu
Vegnan viers nus sco in flum giu dils aults
Els schain aunc el stgir sc’in affon buc naschiu
Ed ein schi prezius, els schain en nos mauns
Amitgas, amitgs, gl’entir mund en nos mauns

06. Il desideri Cul favugn ei ord cadeina
E tila tras nossa val
Lu tschaffa nus il desideri
Che fa stenscher tut il mal

Che fa nescher nova veta
E luenta sentiments
Gie cu l’aria ei schi tievia
Cresch’en nus igl ardiment

Quell’ardur che brischa
E garegia aunc dapli
Daco duessel ella sbetter
Ella ch’ei zatgei schi bi

Culla nav dil desideri
Laschel mei uss tschallatar
Senza mai vegnir a riva
Vi en perpeten navigar

07. Di per di Adin’e trasor ver da far
Buc piarder temps ni tanglergnar
Ei va gia liber la damaun
Gasetta, novitads e paun
Gie buca munchentar tut quei
Vess gie saviu schabiar zatgei
Ed el fuss buca gnius sisu

Lu cugl auto a luvrar
Carrar, menar, telefonar
Quei ch’ei fatg ei rugalau
El ei in um fetg fatschentau
Il temps s’avonza incuntin
Il traffic crescha senza fin
Tuts vesan ch’el ei impurtonts

En biro magliacs da far
Tut ei schi spert da terminar
E vess’in di el pauc lavur
Lu gie buc forsa dar sinzur
E po buc dir ch’ins hagi temps
E po buc dir ch’ins sei cuntents
Pertgei quei sveglia disfidonza

Da miezdi duront gentar
Empau selamentar con bia
Sururas ch’el ha fatg tschei onn
E suenter tempo vinavon
Sesidas, mails e telefons
La sera lu sco pli davos
Ir ord biro, quei plai al boss

Egl auto vai encunter ca
Menar, tibar, telefonar
El pub aunc spert a beiber in
Quei ei siu pli davos termin
In flirt cun quella alla bar
In davos schluc e lu pagar
Mo ussa spert a cas’el va

Duront tscheina vegn mirau
Televisiun e pauc tschintschau
E suenter gie buc munchentar
Las novitads aunc inaga
Cuort buna notg als dus affons
Che filan lura sut ils ponns
Lu aunc viaden egl internet

E lu durmir pertgei segir
Va ei damaun sco oz ed ier
El ha mai temps da patertgar
El ha mai temps da sefermar
Quei tempo sposs’el di per di
Entochen che el po buc pli
Lu eisi forsa tard da far in tec pli plaun

08. Andorra Cu jeu hai buc la curascha
Da star si ed arver la bucca
Cu jeu queschel tgeu enstagl
Da dir el dretg liug quei che tucca
Cu jeu sezuppel el rosch dalla massa
S’exponel mo per miu avantatg
Cu jeu fetsch beffas culs pli fleivels
E sun sez il pli grond buglialatg
Lu ei Andorra en mei

Andorra, jeu hai encuretg tei
Andorra, jeu hai anflau tei
Ti eras en mei, entuorn mei
Dapertut, dapertut Andorra

Cu’i dat mo duas sorts da carstgauns
Tschels schliats e nus secapescha ils buns
Luvrers jasters ein mo pli verti
Cu’i lavuran fetg cun pal’e zappun
Cu’ins drov’il plaid tamil per rir
Or glieud e per zundrar
Cu quels ch’han aids ein sezs la cuolpa
E fussen d’extirpar
Lu ei Andorra entuorn mei

Cu nus essan leds dad esser Svizzers
D’esser quels ch’ein maina culponts
Cu nus savein selavar or
Per tut plein stgisas vein danvonz
Cu nus essan senza macla
Ed il mund vul explodir
Culs malfatgs dall’historia tuornan
Trasor a vegnir
Lu ei Andorra dapertut

09. Romontsch Buc mo cun gronds plaids e buc cun perdegar
Buc cun far da pauper e buc cun lamentar
Buc mo cun daners ni cun instituziuns
Buc cun grondas tschatschras
E buc cun subvenziuns
Eis ti da salvar

Buc cun litteratura e buca cun cantar
Buc cun dictatura e buc cun resignar
Buc cun pugn en sac e buc cun illusiuns
Buc cun pli bia radio e cun televisiun
Eis ti da salvar

Neu e discuora romontsch, quei bi lungatg
Semplamein pretenda risguard per tiu patratg

Buca la reclama sil latg pastorisau
Buca la regenza e buc il Sontgaclau
Buc il chor viril e buc gl’aug giu Turitg
Buca inscripziuns sin preits en mintga vitg
San tei salvar

Buc dus plaids romontsch
Giu Bern el parlament
Buca translaziuns che van da pegna en
Buca subvenziuns per l’administraziun
Buc’in tschuat daners per l’atgn’inscenaziun
San tei salvar
Stai si e drova romontsch, quei bi lungatg
Fermamein sedosta, cu auters camondan
Sin tiu fatg

Buc il Cussegl grond e buca la scoletta
Buc rumantsch grischun e buca la gasetta
Buc cun toleranza e buca cun purists
Buc cun parlahanzas e buca cun turists
Eis ti da salvar

Buc cun suttacumber e buc cun sescagnar
Buc cun nostalgia e buca cun betlegiar
Buc cun extremissem e buc cun ir naven
Ni cun trer tut ensemen vi e dil tempel en
Eis ti da salvar

Neu e discuora romontsch, tiu bi lungatg
Semplamein pretenda risguard per tiu patratg
Stai si e drova romontsch, tiu bi lungatg
Fermamein sedosta, cu auters camondan
Sin tiu fatg

10. Sas aunc Sas aunc seregurdar
Cu nus essan sevesi l'emprema ga
Nos egls ein secapi
E ti has plaschiu schi bein a mi

Con bials fuva quei temps
Con verds il pastg, con cotschens il sulegl
Con bials fuva quei temps
Nus seschenghiavan mintga di
Ti a mi ed jeu a ti

E nus cantavan la canzun en dus
Ei fuva la canzun d'amur da nus

Sas aunc da lezza ga
Ei fuva gest il temps avon fenar
Nos mauns ein secapi
e ti plaschevas aunc pli fetg a mi

Con bials fuva quei temps
Con verds il pastg, con cotschens il sulegl
Con bials fuva quei temps
Nus seperdevan di per di
En quei sulegl schi cauld e bi

E nus cantavan la canzun en dus
Ei fuva la canzun d' amur da nus

11. Sut la plievgia Ei plov’ad in plover, ei plova zun fetg
Il tat va en stiva, il gat va sut tetg
Ei plova e plova cun tun e cametg
Il gat va sut pegna, il tat va en letg

Quels teman la plievgia, quels teman il bletsch
Quels van spert en cucca per esser ametsch
Quels fuin dalla dracca per esser el schetg
Quels fuin cu ei plova, cu’i plova zun fetg

Mo nus vein il gaudi cu nus savein star
Sut la pli gronda plievgia e semplamein schar
Plover e plover da tgau tochen pei
Esser bletschs trasatras, sas con bi che quei ei

Nus mein ella plievgi’a pei blut tral vial
Cavels che daghiran, daguots sin la pial
Nus essan tut smac naven da tgau tochen pei
Schar dar giu il tschiel, sas con bi che quei ei

Ei plov’ad in plover, ei plova zun fetg
Il tat ei sin pegna, il gat ei en letg
Ei plova e plova, gl’ei bletsch dapertut
Nus mein sur ils praus tras la plievgi’en pei blut

Il tat vegn giud pegna, il gat segli’ord letg
Calau hai da plover, giuadô eis ei schetg
Il tat pren la canna, il gat quel fa segls
Vargada la plievgia, uss dat ei sulegl

12. Tgei schessas oz Gia dapi onns eis ti legenda
Vegns da tuttas varts ludaus
Tuts vulan esser buns amitgs
Da tei che eis daditg satraus

Renconuschientscha vesses ti
Duvrau cu ti has cheu viviu
Tgei gida oz in monument
Sch’ins ha tei lura buc capiu

Mo er sche ti vivessas oz
Vesses paucs veneraturs
Da quels sco ti ein pli stimai
Cu’i queschan tgeu sut bialas flurs

Tiu egl vegliont, aviert
Tia carezia per la tiara, pil lungatg
Tes plaids ch’han buc untgiu
Las plagas da tiu temps
Tut quei fuss oz schi impurtont
Sa nu’ti stesses oz
Sa tgei ti schesses
Ti mauncas pir che mai

Ti fusses oz franc e segir
Buc en mongia culs pussents
Tias ideas, tes patratgs
Vessen er oz paucs adherents

Ti fusses oz agl ur e
Malcapius, matei buc prius serius
Dil stadi fusses ti nudaus
Sco subversiv e tip dubius

Ti fusses oz er memia baul
Quei ei’l destin da quels sco ti
Renconuschius vegnas ti pér
Sch’ti eis daditg culs peis ensi

13. Ti eis ius Ti eis ius e cun tei la canzun dalla faultsch
Che mava tral fein tutta stad
E cun tei il tuc-tuc dalla cut el cuzer
Ed il fried dil fein sec madirau

Ti eis ius e cun tei tut quels trutgs tras la neiv
En crusch e traviers da clavau tier clavau
E cun tei la latiarna el stgir dil nuegl
E las notgs a garnugl sin il strom dent’ils tiers

Ti eis ius e cun tei il cavagl, tiu cumpogn
Tes pass sur igl èr gest arau
E cun tei quellas seras da matg si mises
Ed il gust dalla grom’el barcagl

Ti eis ius e cun tei aschi biaras historias
Che mavan tral temps viaden el vargau
E cun tei tiu lungatg, tut quels plaids da tschels onns
E la peda da star e mirar, paterlar

Ti eis ius e cun tei aschi biars da tiu pèr
Senza grondas caneras, naven
E cun vus las latiarnas, las seras da matg
E vos pass e vos trutgs, a traviers ed en crusch

14. La cavalcada Dus fumegls dad in patrun
Luvravan ensemen
Magliavan ensemen
Durmevan ensemen
In era tafers e plein possa
L’auter schampers
E mo pial ed ossa

Il tafer lu in di manegia
Nus luvrein ensemen
Magliein ensemen
Durmin ensemen
Daco sundel jeu plein possa
E ti schampers
E mo pial ed ossa

Mintga notg vegn enzatgi
A mi cavester metta si
E lu stoiel cavalcar
L’entira notg entochen clar
Suenter quella cavalcada
Ei mia membra stunclentada
Cavalcar entochen clar

Il ferm rispunda lu beinspert
Jeu stundel l’autra notg allerts
Lein mo mirar tgei che sai far
Per cun quei gianter far calar
Lein mo mirar tgi che damaun
Ha lu las hottas enta maun
Far calar da cavalcar

Cu la persuna l’autra ga
Vegn puspei per cavalcar
Ha ella senza far per senn
Si sez cavester en in mument
Il ferm dils dus ei uss menader
Va a cavagl, ei cavalcader
Cavalcar senza calar

Suenter liunga cavalcada
Tiel fravi fan ina fermada
Il cavagl vegn enferraus
Il tur allura cuntinuaus
Quei enzatgi sto cavalcar
L’entira notg entochen clar
Cavalcar entochen clar

A solver vegn l’autra damaun
Cun schliata luna la patruna
Cun schliata luna
Ell’ha ses mauns stuiu enfaschar
Ed ei stauncla
Sco’lla vess l’entira notg
Stuiu cavalcar

15. Ti fiug Ditg has ti fiug teniu
E derasau calira
Mo ussa eis ti stez
II vent ha tei surpriu

Forsa fug'aunc la burnida
Sut tia tschendra grischa
Fors'il favugn da primavera
Cun sia forza tei envida

Forsa enzatgi che metta
Ella burnida in rom sec
Ni ch'in sufla aschi ditg
Toch'ins ves'ina flommetta

O ti fiug
Silmeins in mument
Mo in mument
Duesses arder sco antruras
E dar cauld

Mo la burnida sesferdenta
E siu tgietschen vegn pli stgirs
II ner da cotgla dominescha
Mo ina sbrenzla tgeuamein semuenta

Sbrenzla, ti eis la restonza
Da flommas grondas, maiestusas
Ti tarlischas sc'ina steila
Ed eis il segn da speronza

Pertgei ina sbrenzletta sa
Esser I'entschatta d'in grond fiug
Daco duess buc quella sbrenzla
Flommas derasar