Pign premi Walo 1986

Alexi Nay e Marcus Hobi sepresentan l’emprema gada 1983
a Laax cun atgnas canzuns e cun canzuns popularas romontschas.
Igl eco positiv motivescha els da publicar treis producziuns
e quasi 40 canzuns romontschas enteifer sis onns:
«Ina canzun» (1984), «In clom» (1986) ed «Anavon» (1990).

Igl onn 1986 retscheivan Alexi e Marcus il pign premi Walo sco
megliers artists giuvens dalla Svizra. Cunzun la canzun
«Il clom dalla Greina» fa els enconuschents lunsch entuorn.
Ulteriuras dinstincziuns suondan, numnadamein il premi da cultura
«Pader Flurin Maissen» (1990) ed il premi da promoziun
dil cantun Grischun (1991).

En lur canzuns ein legria e tristezia, amur e gretta, malenconia
e protest fetg datier in da l’auter. Ed adina e surtut dominescha la
speronza. Musicalmein slargan Alexi Nay e Marcus Hobi lur
spectrum enten collaborar cun auters musicists. Ellas empremas
canzuns domineschan las duas vuschs cun gl’accumpignament
da ghitara, silsuenter portan differents instruments novas colurs viaden
elllas canzuns – mo adina restan las duas vuschs el center.

La novissima producziun «Salischina» (2008) muossa puspei tut las
fassettas dalla musica dad Alexi e Marcus. Igl ei il resultat d’ina
liunga collaboraziun, duront la quala text e musica ein adina puspei
sesanflai e s’unificai ad ina unitad perschuadenta.