Alexi Nay
Marcus Hobi

«E nus cantavan la canzun en dus»

Niev dc «L’alva»
Alexi e Marcus
En lur canzuns ein legria e tristezia, amur e gretta, malenconia e protest fetg datier in da l’auter. Ed adina e surtut dominescha la speronza. Musicalmein slargan Alexi Nay e Marcus Hobi lur spectrum enten collaborar cun auters musicists. Ellas empremas canzuns domineschan las duas vuschs cun igl accumpignament da ghitara, silsuenter portan differents instruments novas colurs viaden elllas canzuns – mo adina restan las duas vuschs el center.

Alexi Nay e Marcus Hobi sepresentan l’emprema gada 1983 a Laax cun atgnas canzuns e cun canzuns popularas romontschas. Igl eco positiv motivescha els da publicar treis producziuns e quasi 40 canzuns romontschas enteifer sis onns: «Ina canzun» (1984), «In clom» (1986) ed «Anavon» (1990). Igl onn 1986 retscheivan Alexi e Marcus il pign premi Walo sco megliers artists giuvens dalla Svizra. Cunzun la canzun «Il clom dalla Greina» fa els enconuschents lunsch entuorn. Ulteriuras dinstincziuns suondan, numnadamein il premi da cultura «Pader Flurin Maissen» (1990) ed il premi da promoziun dil cantun Grischun (1991). La davosa producziun «Salischina» (2008) muossa puspei tut las fassettas dalla musica dad Alexi e Marcus. Igl ei il resultat d’ina liunga collaboraziun, duront la quala text e musica ein adina puspei sesanflai e s’unificai ad ina unitad perschuadenta.

Discografia
cumpara 2020 L’alva

Ils 18 d’avrel 2020 cumpara il tschunavel portatun dad Alexi e Marcus. Igl album cul tetel L’ALVA cuntegn 15 canzuns, la raccolta musicala dils davos 10 onns. Igl ei canzuns dalla plema dils dus cantauturs, mo era enqual melodia dad Alexi e Marcus cun texts dad auters auturs e quater canzuns da cumponists romontschs en in niev vestgiu. Las canzuns meinan nus siado en las muntognas, en temps vargai, mo era viaden el profund da nies intern. Forsa pon ellas leventar tscheu e leu in surrir, dar mintgaton da patertgar, mo ellas vulan surtut far plascher ed ir a cor.

Il disc L’ALVA sa vegnir empustaus gia ussa ed el vegn lura furnius suenter ils 18 d’avrel 2020.

Ei dat era la pusseivladad dad empustar il portatun sco platta fonografica da vinil, inclusiv carta da download per tedlar la platta a moda digitala. Ei setracta dad ina ediziun limitada da 100 tocs.

details Shop
cumpariu 2008 Salischina

«Salischina» ei suenter «Ina canzun» (1984), «In clom» (1986) ed «Anavon» (1990) il quart album dad Alexi e Marcus. Las quendisch canzuns han profundas ragischs ella cuntrada e cultura muntagnarda ed han el medem mument ferms ligioms cul temps present. «Salischina» meina nus viaden el mund misterius dallas detgas, mo era surtut en munds che sesanflan en nossa vischinonza ed egl intern da nusezs – e buca il davos en in mund da tuns, melodias e canzuns. Differentas musicistas e musicists dattan cun lur instruments, cun lur vuschs e cun lur improvisaziuns a mintga canzun ina tempra speciala. Quater canzuns digl album ein reprisas da canzuns dallas duas empremas producziuns e sin «Salischina» resunan ellas cun novs arranschaments. «Salischina» ei dil reminent in’alp sin territori dalla vischnaunca da Vrin. Las tegias crap dattan perdetga dils temps vargai e las detgas relatan dils misteris da quei liug.

details Shop
cumpariu 1990 Anavon

«Anavon» – suenter «Ina canzun» (1984) ed «In clom» (1986) la tiarza producziun dad Alexi Nay und Marcus Hobi – cuntegn endisch canzuns che han tuttas ina stretga relaziun cun la tiara e cun il carstgaun. Ina part dallas canzuns sco per exempel «Vinavon anavon», «Politica» e «Fatschas» criticheschan il carstgaun en siu esser e cunfar, autras pli liricas sco per exempel «En quella tiara», «Tiara mia» e «Siemi» sedrezzan plitost alla tiara entuorn nus ed alla tiara imaginativa en nies intern. L’integraziun da novs instruments dattan allas canzuns nova tempra e novs accents musicals. Suenter il disc cumpact «Anavon» astgan Alexi Nay e Marcus Hobi retscheiver duas dinstincziuns, numnadamein il premi cultural «Pader Flurin Maissen» (1990) ed il premi da promoziun dil cantun Grischun (1991).

details Shop
cumpariu 1986 In clom

Suenter «Ina canzun» (1984) cun sedisch canzuns romontschas publicheschan Alexi e Marcus dus onns pli tard lur secunda producziun «In clom». El center da quei disc cumpact stat la canzun «Il clom dalla Greina», la quala ha fatg enconuschents ils dus cantauturs sur ils cunfins dalla Romontschia ora. Aschia han Alexi e Marcus saviu retscheiver 1986 il «pign premi Walo» sco renconuschientscha per lur lavur. Il dc «In clom» documentescha il svilup dil duo. Cun sia ghitara acustica porta Jürg Gautschi viaden novs elements e novas colurs ellas canzuns. Canzuns liricas e canzuns da protest stattan ina sper l’autra sil dc «In clom» e secumpleteschan ad ina unitad. «Il clom dalla Greina», «Siemi da Nadal» mo era autras canzuns da quei dc ein aunc oz enconuschentas ed ein daventadas sezzas canzuns popularas.

details Shop
cumpariu 1984 Ina canzun

Gl’atun 1983 ein Alexi e Marcus sepresentai l’emprema gada publicamein a Laax sco cantauturs romontschs e strusch miez onn pli tard han els ediu lur emprema platta fonografica/cassetta cul tetel «Ina canzun». Las sedisch canzuns muossan quei che ei tipic per Alexi e Marcus: cant en duas vuschs cun accumpignament da ghitara acustica. Las canzuns descrivan situaziuns ord il mintgadi, relaziuns interhumanas, la relaziun dil carstgaun cun siu ambient da viver e buca paucas ein da natira critica enviers la societad. Elements dalla canzun populara romontscha mischedai cun autras influenzas musicalas laian nescher ina sort da folk romontsch. Cun quella producziun han Alexi Nay e Marcus Hobi schau anavos fastitgs ed entginas dallas sedisch canzuns ein daventadas sezzas canzuns popularas.

details Shop
Agenda
Informaziuns suondan
Fotos
Audio e video
Salischina 4:06
Greina 4:12
Politica 4:48
Ti fiug 3:03
Anavon 4:27
Al Rein 3:43

Salischina, ord l’emissiun «Potzmusig» dils 13 da zercladur 2015 sin SRF 1.

Alexi e Marcus – 35 onns en dus. Film da RTR.
Contact e shop
Indicaziuns persunalas

Empustar disc cumpact

Per favur emplenir ora tut